बलिउडसँगै अन्तर्राष्ट्रिय सिनेमामा आफ्नो अभिनयको पहिचान बनाउन सफल चर्चित बलिउड अभिनेता इरफान खान अभिनित एक फिल्म सन् २०१९ को ओस्कार अवार्डको लागि सिफारिस भएको छ । फिल्म ‘दुब : नो बेड अफ रोजेज’लाई बंगलादेशको ओस्कार कमिटीले विदेशी भाषाको क्याटोगेरीतर्फ सिफारिस गरेको हो । स्मरण रहोस्, केही वर्ष पहिले बंगलादेशमा यो फिल्मलाई प्रतिबन्ध लगाइएको थियो ।

मोस्तफा सरवर फारुखीद्वारा लिखित तथा निर्देशित ‘दुब : नो बेड अफ रोजेज’ फिल्ममा इमरान खानसँगै रुकैया प्राची, नुसरत इमरोज, तृषा र पुर्णो मित्ताले अभिनय गरेका छन् । यो फिल्म अस्कर अवार्डको लागि सिफारिस भएपछि निर्देशन फारुखीले खुशी व्यक्त गरेका छन् । इरफान यो फिल्मका सह–निर्माता पनि हुन् ।

यो फिल्ममा इरफानले एक सफल फिल्म निर्माताको भूमिकामा अभिनय गरेका छन् । जसमा उनले एक्लो जीवनबाट पार पाउन छोरीको साथीसंग सम्वन्ध गाँसेको कथा छ । यो फिल्मको कथा बंगलादेशका चर्चित लेखक तथा निर्माता अहमदको जिन्दगीसँग मिल्दोजुल्दो भएपछि यो फिल्मलाई बंगलादेशमा प्रतिबन्ध लगाइएको थियो ।

अहमदले २७ वर्षपछि आफ्नी पत्नीसँग सम्बन्ध विच्छेद गर्दै पछि आफून्दा ३३ वर्ष कान्छी नायिकासँग विवाह गरेका थिए ।