सूचना प्रविधिमा सहयोग गर्न दक्षिण कोरिया सकारात्मक : मन्त्री बाँस्कोटा

1 Shares

सञ्चार तथा सूचना प्रविधिमन्त्री गोकुलप्रसाद बाँस्कोटाले दक्षिण कोरियाको आफ्नो भ्रमण मुलुकको सूचना र प्रविधिमा सहयोग आदानप्रदान गर्ने विषयमा उलब्धिमूलक भएको बताएका छन् ।

दक्षिण कोरियामा सम्पन्न भएको ‘पिपुल्स कल्चर सेन्टर डिजिटल डेभलपमेन्ट’ विषयको सञ्चार र सूचना प्रविधि मन्त्रीस्तरीय बैठकमा सहभागी भई मन्त्री बाँस्कोटा आज स्वदेश फर्किएका हुन् । दक्षिण कोरियाको सोलमा सम्पन्न उक्त बैठकमा एसिया प्रशान्त क्षेत्रका १२ देशका सञ्चार तथा सूचना प्रविधिमन्त्रीको सहभागिता थियो ।

स्वदेश फर्कने क्रममा मन्त्री बाँस्कोटाले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै बैठकमा मूलभूत रूपमा विश्वमा प्रचलित आधुनिक सूचना प्रविधिमा पछिल्लो समयमा देखिएका चुनौतीको सामना गर्ने सन्दर्भमा आपसी सहकार्यबारे छलफल भएको बताए ।

मनत्री बाँस्कोटाले भने, ‘आधुनिक सूचना प्रविधिको नयाँ रूप ‘विग डाटा’ र ‘आर्टिफिसियल इन्टेलिजेन्स’जस्ता विषयमा पनि समाजलाई अघि बढाउनुपर्छ र त्यसका लागि हरेक देशले तयारी गरी आपसी सहकार्य गर्नेबारे छलफल भयो ।’

बैठकमा सूचना प्रविधिलाई आमजनताको पहुँच तथा जनताको आयमा प्रयोग गर्ने र सूचना प्रविधिको सुरक्षाबारे छलफल भएको मन्त्री बाँस्कोटाले जानकारी गराए ।

बैठकमा हरेक समाजका मूल्य–मान्यता र संस्कृतिको संरक्षण गर्दै डिजिटल प्रविधिको विकासका सन्दर्भमा समाजलाई आधुनिकतातर्फ लैजाने सम्बन्धमा छलफल भएको उनको भनाइ थियो । भ्रमणका अवसरमा मन्त्री बाँस्कोटाले दक्षिण कोेरियाका सूचना तथा विज्ञान प्रविधिमन्त्री यू योङ मिनसँग द्विपक्षीय वार्ता र छलफल भएको अवगत गराउँदै दक्षिण कोरियाले नेपालको ‘डाटा सेन्टर’लाई विस्तार र थप सुदृढ गर्न सहयोग गर्न सकारात्मक देखिएको बताए ।

मन्त्री बाँस्कोटाले भने, ‘चुनौती बन्दै गएको साइबर सुरक्षामा ज्ञान आदानप्रदान र डिजिटल साक्षरतामा पुँजी, प्रविधि र ज्ञानका क्षेत्रमा सघाउने विषयबारे सकारात्मक छलफल भयो ।’ भ्रमणमा सूचना प्रविधिमा सहकार्यका लागि महत्वपूर्ण घोषणा भएको र कोरियासँगको द्विपक्षीय भेटवार्ता पनि नेपालको लागि लाभदायी भएको मन्त्री बाँस्कोटाले बताए ।

1 Shares

प्रतिक्रिया