विश्वभरका बीस लाखभन्दा बढी मुस्लिम हज गर्न पवित्र तीर्थस्थल साउदी अरबको मक्कामा भेला भएका छन् । विश्वमै सबैभन्दा ठूलो धार्मिक कार्यक्रमको रूपमा लिइने हजयात्रा आइतबार (आज) देखि शुरु भएको हो ।
मुस्लिम धर्मावलम्बीको पाँच प्रमुख धार्मिक कार्यक्रममध्ये एक मानिने मक्काको हजयात्रा ६ दिनसम्म गर्ने परम्परा छ । ‘हजयात्राका लागि मक्कामा आउनु हरेक मुस्लिम धर्मावलम्बीको सपना हो,’ फ्रान्सेली हजयात्री सोलिमान बेन मोहरीले बताए ।
‘यो एउटा सर्वश्रेष्ठ र अन्तिम यात्रा हो, र यो मेरो सपना थियो, त्यही क्षण अहिले पाएको छु,’ ५३ वर्षीय मोहरीको भनाइ छ । हरेक मुस्लिम धर्मावलम्बीले जीवनमा एकपटक हजयात्रा गर्नुपर्ने धार्मिक विश्वास रहिआएको छ ।
हजयात्रा स्थलमा दशौँ हजार सुरक्षाकर्मी हजयात्रालाई सुरक्षित र व्यवस्थित तुल्याउन खटिएका छन् । हजयात्राका क्रममा भागदौडमा परी तीन वर्ष पहिले २,३०० हजयात्रीको मृत्यु भएको थियो ।
हजयात्रालाई सुरक्षित र व्यवस्थित गराउन साउदी अरबले यसपटक ‘स्मार्ट हज’ एप बनाएर त्यसमार्फत सूचना तथा जानकारी दिने प्रबन्ध मिलाएको छ । त्यस एपमा यात्रा योजनादेखि उपचारमा ध्यान दिनुपर्ने कुरा राखिएका छन् ।
साउदी अरबका गृहमन्त्रीले शनिबार मात्रै २० लाखभन्दा बढी हजयात्री मक्कामा आइपुगेको जानकारी दिए । हज गर्न इजिप्ट, भारत, पाकिस्तान, बंगलादेशलगायतका देशबाट ठूलो संख्यामा मुस्लिम धर्मावलम्बी यहाँ भेला भएको गृहमन्त्रीले बताए ।
यात्रामा रहेका अधिकांशले आइतबार मक्काबाट हजयात्रा सुरु गरी राति मीना उपत्यकामा बास बस्नेछन् । त्यहाँ आगलागीबाट जोगाउन मद्दत गर्ने टेन्टहरूमा उनीहरू रहने अधिकारीको भनाइ छ ।
मक्काबाट मीनासम्मको आठ किलोमिटर सडकमा हजयात्रीलाई ओसार्न हजारौँ बस र अरू सवारीसाधन लामबद्ध हुन्छन् । धेरै हजयात्री यो सडकमा टन्टलापुर घामको पर्वाह नगरी पैदलै हिँड्ने गर्दछन् ।
सोमबार हजको मुख्य स्थान मीनाको माउन्ट अराफातमा उक्लिनेछन् र त्यहाँ पवित्र धार्मिक ग्रन्थ कुरानको पाठ गर्दछन् । इस्लाम धर्मअनुसार त्यसपछि उनीहरू अराफात र मीनाको बीचतिर रहेको मुज्दालिफातर्फ लाग्छन् र त्यहाँ कम्तीमा मध्यरातसम्म बस्छन् ।
उनीहरुले इद अल–अधा पर्वको पूर्वसन्ध्यामा त्यहाँ सैतानमाथि सांकेतिक रूपमा ढुंगा बर्साएपछि हजयात्रा समाप्त हुन्छ ।
प्रतिक्रिया