अमेरिकी प्रतिबन्धका कारण रुसी मुद्राको भारी अवमूल्यन

अमेरिकी प्रतिबन्धका कारण रुसी मुद्राको भारी अवमूल्यन


अमेरिकाले रुसविरुद्ध घोषणा गरेको पछिल्ला आर्थिक प्रतिबन्धहरूका कारण अमेरिकी डलरको तुलनामा रुसी मुद्रा रुबल दुई वर्षयता सबैभन्दा बढी अवमूल्यन भएको छ ।

बेलायतमा बस्दै आएका एकजना पूर्वरुसी जासुसमाथि स्नायु प्रणालीमा असर पार्ने घातक आक्रमण गरेको विरोधस्वरूप अमेरिकाले प्रतिबन्धहरू घोषणा गरेको हो ।

वासिंटनको दण्डात्मक कारबाहीका कारण बिहीबार बिहान अमेरिकी डलरको तुलनामा रुबलको मूल्य ६६.४८ पुगेको छ । यो मूल्य नोभेम्बर २०१६ यताकै सबैभन्दा कम हो ।

अमेरिकी प्रतिबन्धको असर रुसी सेयर बजारमा पनि परेको छ । रुसी स्टक एक्सचेन्ज ३.२ प्रतिशतले घटेको छ भने मोएक्स इन्डेक्स झन्डै १.२ प्रतिशतले तल झरेको छ । रुसी बैंकहरूको सेयर पनि ओरालो लागेको छ । राज्य सञ्चालित स्वरबैंकको सेयर ४.७ बिन्दुले घटेको छ ।

अमेरिकी विदेश मन्त्रालयले बुधबार मात्र नयाँ प्रतिबन्धहरूको घोषणा गरेको थियो । बेलायतमा बसोवास गरिआएका बेलायती नागरिक सर्गेई स्क्रिपाल र उनकी छोरी युलियामाथि गत मार्च महिनामा रुसी जासुसहरूले नोभिचोक नामको स्नायुप्रणालीमा असर पार्ने एजेन्टले आक्रमण गरेका थिए ।

‘अन्तर्राष्ट्रिय कानुनको उल्लंघन गरी रासायनिक वा जैविक हतियार प्रयोग गरेको देखिएकोले रुसमाथि यस्तो कारबाही गर्नुपरेको हो,’ अमेरिकी विदेश मन्त्रालयका प्रवक्ता हिथर नर्टले जारी गरेको विज्ञप्तिमा उल्लेख छ ।

प्रतिबन्धअन्तर्गत ‘राष्ट्रिय सुरक्षा संवेदनशील’ अमेरिकी प्रविधिहरू रुसलाई बेच्न पाइनेछैन । यस्ता प्रविधिहरूमा विद्युतीय उपकरणहरूका साथै क्यालिब्रेसन उपकरणहरू रहेका छन् । विगतमा यस्ता उपकरणहरू निर्यात गर्न दिइएको थियो ।

रुसले युक्रेनमाथि गरेको व्यवहारका कारण लागेको अन्तर्राष्ट्रिय प्रतिबन्ध तथा त्यही वर्ष तेलको मूल्यमा आएको भारी गिरावटका कारण रुसको अर्थतन्त्र सन् २०१४ को अझै तंग्र्रिन सकेको छैन । दुई वर्षको आर्थिक संकटपश्चात् सन् २०१७ बाट रुसको अर्थतन्त्र सही बाटोमा आएको थियो ।

अमेरिकाले लगाएको नयाँ प्रतिबन्ध गैरकानुनी छ, यो अस्वीकार्य पनि छ : रुस

यसैबीच, अमेरिकाले लगाएको प्रतिबन्ध अस्वीकार्य रहेको भन्दै रुसले आपत्ति जनाएको छ, तर अमेरिकासँगको सम्बन्ध रचनात्मक दिशातर्फ उन्मुख हुने अपेक्षा गरिएको छ ।

‘अमेरिकाले लगाएको नयाँ प्रतिबन्ध गैरकानुनी छ, यो अस्वीकार्य पनि छ,’ क्रेमलिनका प्रवक्ता डिमित्री पेस्कोभले बताए ।