रसियामा हालै सम्पन्न विश्वकप फुटबलको फाइनल खेलका दौरान मैदानमा प्रवेश गर्ने चारजनालाई जेल सजाय भएको छ । रसिया सरकारले फाइनल खेलका दौरान मैदानमा प्रवेश गर्ने ‘पुसी राइट फेमिनिस्ट पंक ग्रुप’का चार सदस्यलाई जेल सजाय तोकेको हो । उनीहरूलाई १५ दिनको जेल सजाय दिइएको छ ।

मस्कोको अदालतले पुसी राइटका चार सदस्य बेरोनिका निकुलशिना, ओल्गा कुराचेवा, ओल्गा पाखतुसोवा र प्योतर वेरजिलोवलााई १५ दिनको जेल सजाय सुनाउनुको साथै तीन वर्षसम्म कुनै पनि खेल प्रतियोगिताको आयोजना स्थलमा जान प्रतिबन्ध लगाएको छ ।

पुसी राइटका यी चारजना सदस्यले दर्शकसम्बन्धी नियमको पूर्ण रूपमा उल्लंघन गरेको आरोपमा उनीहरूलाई अधिकतम सजाय दिने क्रममा यस्तो सजाय दिइएको हो ।

चारैजना फ्रान्स र क्रोएसियाबीच भएको फाइनल खेलका क्रममा लुन्जिकी रंगशालामा पुलिसको पोसाक लगाएर प्रवेश गरेका थिए । खेलको दोस्रो हाफमा प्रवेश गरेका यी चारजनाका कारण फाइनल खेल केही समय रोक्नुपरेको थियो । सो समयमा उक्त फाइनल खेल हेर्न रसियाका राष्ट्रपति भ्लादिमिर पुटिन, फ्रान्सका राष्ट्रपति इमानुएल, क्रोएसियाका राष्ट्रपति कोलिन्डा र फिफा अध्यक्षको रंगशालामा उपस्थित थिए ।