अवैध रकम सञ्चित गर्नेहरुका लागि सहज मुलुकको रुपमा समेत चिनिने स्वीजरल्याण्डका बैंकमा नेपालीको अर्बौं रुपैयाँ रहेको खुलासा भएको छ । तर उक्त रकम क-कसको हो ? भन्नेबारे केही खुलेको छैन । विदेशी बैंकमा नेपालीले अर्बौ रुपैयाँ राखेको खुलासा हुँदा नेपाल राष्ट्र बैंक भने बेखबर छ ।

स्वीस नेशनल बैंक (एसएनबी)ले हालै मात्र सार्वजनिक गरेको सन् २०१७ को वार्षिक प्रतिवेदन अनुसार नेपाली नागरिकहरुले उक्त बैंकमा ठूलो मात्रामा रकम जम्मा गरेको रहस्य खुलेको छ । सन् २००८ मा स्वीजरल्याण्डका बैंकहरुमा ८ करोड ६२ लाख २१ हजार स्वीस फ्रैंक बराबरको नेपाली रुपैयाँ रहेको तथ्यांक सार्वजनिक भएको थियो । अहिले उक्त रकम बढेर ३२ करोड २८ लाख ८४ हजार पुगेको छ । विभिन्न विदेशी बैंकहरुमा खाता खोलेर रकम जम्मा गर्नु गैरकानुनी भएको नेपाल राष्ट्र बैंकका डेपुटी गभर्नर चिन्तामणि शिवाकोटी बताउँछन् ।

सन् २०१७ मा स्वीस बैंकहरुमा नेपाली बैंकहरुको ३० करोड ७२ लाख ७१ हजार स्वीस फ्रैंक रहेको तथ्यांक छ । यस्तै, १ करोड ४७ लाख ८५ हजार स्वीस फ्रैंक अन्य ग्राहकको भएको एसएनबीले जारी गरेको प्रतिवेदनमा उल्लेख छ । तर बैंकको प्रतिवेदनमा भने ८ लाख २९ हजार स्वीस फ्रैंक बचतकर्ताको परिचय भने खुलाइएको छैन ।

यता, नेपाल राष्ट्र बैंकले भने नेपाली नागरिकहरुले बिरामीको उपचार, अध्ययन, भ्रमण र वस्तु खरिदका लागि मात्रै विदेशी बैंकहरुमा रकम जम्मा गर्न पाउने कानुनी व्यवस्था रहेको जनाएको छ । कुनैपनि नेपालीले विदेशका बैंकहरुमा रकम जम्मा गरेकोबारे नेपाल आएको ३५ दिनभित्र राष्ट्र बैंकलाई जानकारी गराउनुपर्ने कानुनी व्यवस्था रहेको डेपुटी गभर्नर शिवाकोटीको भनाई छ ।

‘पछिल्लो समय नेपालका सिमाक्षेत्रका नागरिकहरुले छिमेकी मुलुकका बैंकहरुमा रकम जम्मा गर्ने गरेका छन् ।’ उनले भने, ‘विदेशका बैंकहरुमा गैरकानुनी रुपमा रकम जम्मा गर्नु अपराध हो । त्यस्तो रकमको स्रोत देखाउनु पर्नेछ ।’