बुटवल उपमहानगरपालिकाको प्रशासनिक भवन शिलान्यासका लागि आज बुटवल आएका नेपाल कम्युनिस्ट पार्टीका महासचिव विष्णु पौडेलले प्रधानमन्त्री केपी शर्मा ओलीको चीन भ्रमण उत्साहजनक भइरहेको बताएका छन् ।

शुक्रबार बुटवलमा आयोजित कार्यकर्ता भेटघाट कार्यक्रममा पौडेलले भने, ‘अब ढिलोमा सात वर्षमा काठमाडौंमा रेलमार्ग सञ्चालन हुन्छ ।’

महासचिव पौडेलले पर्यटन, ऊर्जा, सडक सञ्जाललगायत विभिन्न विषयमा चीनसँग सहमति हुने बताउँदै चीन र भारतसँगको समान सम्बन्धबाट नेपालको विकास सम्भव हुने धारणा सो अवसरमा व्यक्त गरे ।

‘दुई पार्टीबीचको एकताले केहीलाई विचलित बनाएको छ, त्यसैले उनीहरूले ठाउँ खोजिरहेका छन्,’ महासचिव पौडेलले भने ।

मुलुक राजनीतिक स्थिरता र विकासको चरणमा छ भन्दै उनले यसबाट मुलुकले दिगो लाभ हासिल गर्दा समृद्धि प्राप्त हुने बताए ।