यातायात क्षेत्रको सिण्डिकेट तोड्ने प्रयत्न गरेर चर्चामा आएको ओली सरकारले म्यानपावर क्षेत्रमा हुँदै आएको अनियमितता तथा चरम भ्रष्टाचारविरुद्ध कदम बढाएको अनुभूति गरिएको छ । मलेसियाको भीसा शुल्क ७ सय लेखेर ७ हजार असुल्ने र स्वास्थ्यपरीक्षणको नाममा लुट मच्चाउनेहरु ‘अपरेसन ओभरसिज फ्रड’अन्तर्गत आइतबार पक्राउ परेपछि यस्तो अनुभूति गरिएको हो । आइतबार गरिएको उक्त अपरेसनमा काठमाडौंबाट ४४ र पाटनबाट चार गरी ४८ जना म्यानपावर क्षेत्रका अभियुक्त पक्राउ परेका बुझिएको छ ।
यीमध्ये राजधानीको मेट्रोपार्कस्थित भीएलएन र वानस्टप सेन्टरमा प्रहरीले विशेष तवरमा छापा मारेको बताइन्छ । श्रम, रोजगार तथा सामाजिक सुरक्षा मन्त्रालयले गृहमन्त्रालयलाई गरेको पत्राचारअनुसार प्रहरीले भीएलएन र वानस्टपमा छापा मारेको हो ।
ती कम्पनीले अवधानिक काम गरेको भनी पहिले नै मन्त्रालयले कामकारबाही बन्द गराएको भएपनि अवैध कार्य जारी राखेको सूचनाका आधारमा छापा मारिएको बुझिएको छ । मलेसिया जाने कामदारहरुलाई आर्थिक भार परिरहेको भन्दै श्रम मन्त्री गोकर्ण विष्टले बायोमेट्रिक, भिएलएन, ओएससी जिएससी र माइग्राम खारेज गर्ने निर्णय गरेका थिए । तर भिएलएनका सञ्चालक रामप्रसाद श्रेष्ठले आफूलाई सच्याउन सकेका थिएनन् । अन्ततः उनलाई पक्राउ गरिएको महानगरीय प्रहरी परिसर काठमाडौं स्रोतले जनाएको छ ।
मलेसिया जान भिसा शुल्क जम्मा ७ सय लाग्नेमा अनलाइन प्रोसेस भन्दै भिएलएन नामक संस्थाबाट ३२ सय र कर असुल गरिँदै आएको थियो । श्रेष्ठको संस्थाले करिव साढे दुई अर्ब गैरकानुनी रुपमा उठाएको बताइएको छ।
ज्ञातव्य छ, रामप्रसाद श्रेष्ठ कांग्रेस नेता गोपालमानका भतिज हुन्। रामप्रसादले देउवापत्नी आरजु राणा र वैदेशिक रोजगार विभागका तत्कालीन महानिर्देशक विश्वराज पाण्डेको आडमा अवैध रुपले धन्दा चलाई युवाहरुलाई ठगी गर्दै आएका र अवैध कमाइबाट उनले काठमाडौं उपत्यका, चितवन र झापामा विभिन्न कम्पनीको नाममा १० अर्बभन्दा बढी मूल्यको जमिन खरिद गरेका उनीनिकट सुत्रले जनाएको छ । सम्पत्ति शुद्धिकरण र मुद्रा अपचलनका नाइकेका रुपमा समेत श्रेष्ठलाई निकटजनहरुले चिन्ने गरेका छन् ।
प्रतिक्रिया